مشتاق ليك كتير والله
وللجيران وللحلة
كمان قطر النضال ولىَّ
وغالي عليَّ أدلىّ
محطة محطة بتذكر عيونك ونحن فى المنفى
بتذكر مناديلك خيوطها الحمرا ما صدفة
بتذكر سؤالك ليَّ متين جرح البلد يشفى
متين تضحك سما الخرطوم حبيبتنا ومتين تصفى
سؤالك كان بيعذبنا ويقربنا ويزيد ما بينا من الفة
ويزيدني حماس
وكم فى قلبي دق نحاس
وطار من عيني باقي نعاس
ونحن اتنين بنتقاسم هموم الناس
أعاهدك يا أعز الناس
أسامحك لو نسيتيني وأهنتيني وبكيتي عليَّ
لو فى يوم رميت سيفي ورفعت ايديَّ
وخنت الثورة جيت والذلة فى عينيَّ
حرام عيونك يناغموني ويرحبو بىَّ
حرام ايديك ينومن تاني فى ايديَّ
بس لكن يا ويلي يا ويلي
أقبل وين وأقول يا منو
لمن أخون صباح العين وأخون جيلي
أعاهدك يا قمر ليلي
وحاة أمنا الخرطوم
أشيل شيلي وأموت واقف على حيلي
وأقول ليك يا أعز الناس
على الوعد القديم جايين
ما بين الثورة والسكين
ثوريين حتى الموت ثوريين
وأقول ليك يا صباح العين
بنادق وين بتمنعنا العديل والزين
قنابل وين بنادق وين
أهلاً أهلاً بالأعياد
مرحب مرحب يا أجداد
أفتح... أفتح يا تاريخ أبعاد أبعاد
وأملأ عيون كل الأحفاد بالأمجاد
أفتح محضر باسم الشعب.. بخط الشعب
لوجه الشعب... لخير الشعب
سجل سجل أنحنا الغضب الواعي
ضمير الثورة على استعداد وبالمرصاد
سجل سجل لا أغلال
لا استغلال مع استقلال
لا حرية بلا استبسال
استشهاد باستمرار وعلى استعداد وباستعداد
خط النار اتعبَّ وزاد
وقول للشهدا الختو الذات
وباسمنا هتفوا وبينهم وبين الموت خطوات
الجايين من قلب الشارع من ثكنات
سجل أنحنا برغم جرحنا اجتزنا المحنة
ونحن الليلة أشد ثبات
ونحن بخير ولسه وراكم فى الجايات
لسه ولسه على استعداد
وشعبنا واقف بالمرصاد