أكتوبر هدير الحق
وفارس ليل يشق يا ليل دروبك شق
ودقت دق
طبول العزة دقت دق
يا قرشي الصبي الريان
جبينك لاح يقطر دم
وكتفك لافتة فوق شارعنا ما بتنجم
نشيلا أيادي ما بترتاح
نشيلا مبادئ ما بتهزم
وما بنسكت على السفاح يا قرشي
عبدالخالق العامر يحب الناس
قدامنا انفتح كراس بخط ايديك وضو عينيك
سطورو الغالية تتبسم
ويابا الشفيع الساس
ضلالة هجير الصيف
ويا تار البلد جوزيف
ويا يوليو القلم والسيف
وضابط حر شديد البأس
مشينا ونمشي نتحزم
بمجد الشعب والنبراس
يا أكتوبر الجايات تسنك سن
يا أكتوبر الجايات بشائر جن
على السفاح بيتقسن
على المستقبل الأحسن
طلائع الجبهة تتقدم
ويوم الدم يلاقي الدم
ويوم تشفع يا موردنا والمنبع
وتغلي مداخن المصنع
ويسكت جنبها المدفع
ونحو القصر حتى النصر
وليل القصر يتعتم
وتتقدم طلائع الجبهة تتقدم
غنى ياخرطوم غنى
شدى أوتار المغنى
ضوى من جبهة شهيدك
أمسياتك واطمئنى
نحنا منك ريح وهبت
نار وشبت
فى وجوه الخانو اسمك ياجميلة
ونحن ياست الحبايب من ثمارك
فى دروب الليل نهارك
وقبل مايطول انتظارك
نحن جينا
وديل أنحنا القالو متنا
وقالوا للناس انتهينا
جينا زى ما كنا حضنك... يحتوينا
لما فارسك فينا هبَّ
وعبَّ حجرك بالمحبة وبالأماني
صحى نار الثورة تاني وجانا داخل
زي شعاع الشمس من كل المداخل
وهز بالمنشور وبشر
ياما فرهد فى عيونك غصن أخضر
وفرحة أكبر من شجونك
والسلاسل يا جميلة
يوم ما كان ميلاد شهيدك
يلا غني ولاقي عيدك
ولى ثمارك لقي ايديك
جيل مكافح حلَّ قيدك
فى غضبنا الحر ولافح
وياما باكر وفى زنازين العساكر
نبني مجدك ومهرجانك
وكل قطرة دم عشانك
ولى جديدك يا جميلة